پاکستان کے صوبہ پنجاب کے شہر فیصل آباد کی انسداد دہشت گردی عدالت نے لگ بھگ دو سال قبل نو مئی کو جلاؤ گھیراؤ کے مقدمات میں تحریک انصاف کے رہنماؤں عمر ایوب اور زرتارج گل سمیت 108 ملزمان کو قید کی سزا سنائی ہے۔
جبکہ فواد چوہدری اور زین قریشی کو ان مقدمات سے بری کر دیا گیا۔
فیصل آباد میں دیگر بڑے شہروں کی طرح ملک گیر احتجاج کے دوران حساس ادارے کے دفتر اور پولیس پر حملوں کے چار مقدمات درج کیے تھے۔ ان مقدمات میں تحریک انصاف کے رہنماؤں سمیت 186کارکنوں کو نامزد کیا گیا تھا۔
عدالت نے نو مئی کو پی ٹی آئی کے احتجاج میں توڑ پھوڑ اور جلاؤ گھراؤ کے مقدمات کی سماعت مکمل ہونے پر فیصلہ سناتے ہوئے ملزم عمر ایوب، زرتاج گل، شبلی فراز، اور صاحبزادہ حامد رضا کو 10,10سال کی قید کی سزا سنائی ہے۔
جبکہ جنید افضل ساہی کو تین سال قید کی سزا سنائی ہے۔ عدالت نے پی ٹی آئی رہنما فواد چوہدری، زین حسین قریشی، خیال کاسترو سمیت 77افرادد کو بری کرنے کا حکم سنایا ہے۔
عدالت نے شیخ رشید کے بھتیجے راشد شفیق کو بھی فیصل آباد کے ایک مقدمہ میں دس سال قید کی سزا سنائی ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
نو مئی 2023 عمران خان کی اسلام آباد سے گرفتاری پر پاکستان تحریک انصاف کی جانب سے احتجاج کے دوران ملک کے مختلف شہروں میں پرتشدد واقعات رونما ہوئے تھے، جس کے بعد بڑی تعداد میں مقدمات درج کیے گئے اور گرفتاریاں کی گئی تھیں۔
پی ٹی آئی قیادت اور رہنماؤں سمیت سینکڑوں کارکنوں کے خلاف مقدمات درج کیے گئے تھے۔ سب سے زیادہ مقدمات پاکستان کی مختلف چھاؤنیوں میں توڑ پھوڑ کے درج ہوئے ہیں، جب کہ 102ملزمان کے خلاف فوجی عدالتوں میں مقدمات چلائے جانے کے بعد فیصلے سنائے جا چکے ہیں۔
گذشتہ ہفتے پنجاب کے شہر سرگودھا میں انسداد دہشت گردی کی خصوصی عدالت نے نو مئی 2023 کو میانوالی کے تھانہ موسیٰ خیل میں توڑ پھوڑ اور ہنگامہ آرائی کے مقدمے میں پنجاب اسمبلی میں قائد حزب اختلاف احمد خان بھچر، رکن قومی اسمبلی احمد چھٹہ اور بلال اعجاز سمیت 39 افراد کو 10، 10 سال قید کی سزا سنائی ہے۔
سزا پانے والے دوسرے رہنماؤں میں سینیٹر شبلی فراز، رائے حسن نواز، کنول شوذب، رکن پنجاب اسمبلی جنید افضل ساہی، اویس اکبر، طاہر جاوید، صابر علی، محمد محسن، علی رضا ، مبشر علی، نعمان جمیل، سمیع اللہ، محمد شفیق اور شہزاد الیاس ساجد شامل ہیں۔
پی ٹی آئی کا ردعمل
چیئرمین تحریک انصاف بیرسٹر گوہر نے اسلام آباد میں صحافیوں سے گفتگو میں انسداد دہشت گردی عدالت کے فیصلے پر تنقید کرتے ہوئے کہا کہ ’یہ جو فیصلے آ رہے ہیں اس سے ملک و قوم کا سخت ترین نقصان ہو رہا ہے۔‘
بیرسٹر گوہر کے خیال میں ’اس سے جمہوریت ڈی ریل ہو جائے گی۔‘
انہوں نے کہا کہ انسداد دہشت گردی عدالت کے فیصلوں کو ہائی کورٹ میں چیلنج کیا جائے گا۔
