کیا واقعی کچھ وائرس آپ کی صحت کیلئے فائدہ مند ثابت ہوسکتے ہیں؟
ہر وائرس نقصان دہ نہیں، کچھ فائدہ مند بھی ہیں! سائنسدانوں کی نئی تحقیق
-
ویب ڈیسک -
سائنس دانوں نے نئی تحقیق میں دریافت کیا ہے کہ تمام وائرس انسانی صحت کے لیے نقصان دہ نہیں ہوتے بلکہ کچھ فائدہ مند بھی ہو سکتے ہیں۔
آسٹریلیا کی فائنڈرز یونیورسٹی کے ڈاکٹر جیک رابنسن کی سربراہی میں شائع تحقیق کے مطابق تمام بیکٹیریا یا وائرس بیماری پیدا نہیں کرتے، بعض مائیکروبز انسانی صحت کے لیے اہم کردار ادا کرتے ہیں اور ہمارے جسم کو مضبوط رکھنے میں مددگار ثابت ہوتے ہیں۔
ڈاکٹر جیک رابنسن کے مطابق ماحول میں موجود مختلف مائیکرو بایومز اور قدرتی حیاتی کیمیائی مرکبات بھی انسانی صحت کو بہتر بنانے میں مدد دیتے ہیں۔
انہوں نے کہا کہ جدید تحقیق یہ تسلیم کرتی ہے کہ متنوع ماحولیاتی نظام صحت مند ماحول پیدا کرنے میں کلیدی کردار ادا کرتا ہے۔
تحقیق میں بتایا گیا ہے کہ صحت بخش مائیکروبز مدافعتی نظام کی ترتیب، میٹابولزم، بیماریوں کی روک تھام، دباؤ میں کمی، اور ماحولیاتی استحکام میں مددگار ہوتے ہیں۔ تقریباً ایک صدی تک ہوا میں موجود مائیکروبز اور کیمیائی مرکبات کو صرف خطرہ سمجھا جاتا رہا لیکن اب یہ واضح ہو رہا ہے کہ یہ حیاتیاتی تنوع انسانی اور حتیٰ کہ خلائی صحت کے لیے بھی فعال معاون کا کام کرتا ہے۔
مائیکروبز جلد اور تولیدی صحت، ذہنی سکون، بہتر غذائی اجزا کے ہضم، سوزش میں کمی اور خون میں شوگر کے کنٹرول میں اہم کردار ادا کرتے ہیں۔ جسم میں موجود مائیکروبز کے مجموعے کو’مائیکرو بایوم‘ کہا جاتا ہے، جس میں فنگی، الجی، بیکٹیریا، وائرس، پروٹوزوا، آرکی اور پرایون شامل ہیں۔
ڈاکٹر رابنسن نے کہا کہ صحت مند مائیکروبز کی بحالی کے ذریعے انسان متعدد فوائد حاصل کر سکتا ہے، جیسے وٹامنز کی پیداوار، ہاضمے کی بہتر فعالیت اور مدافعتی نظام کی مضبوطی تاکہ یہ بیماری پیدا کرنے والے جراثیم کے خلاف موثر ہوسکے۔
محققین کا کہنا ہے کہ حیاتیاتی تنوع کا نقصان صحت کے لیے خطرناک ہے، لہٰذا مائیکروبیل اور حیاتی کیمیائی دولت کی بحالی انسانی مستقبل کے لیے ناگزیر ہے۔
