چلنا یا دوڑنا؛ صحت کے لیے کون سا عمل زیادہ بہتر ہے؟
بہتر صحت کے لیے جہاں متوازن غذا نہایت ضروری ہے وہیں جسمانی سرگرمیاں بھی خاص اہمیت رکھتی ہیں، ماہرین کا کہنا ہے کہ چلنا اور دوڑنا یہ دونوں سرگرمیاں ہی قلب کوصحت مند رکھتی ہیں، اور ان دونوں کے کئی ممکنہ فوائد ہیں۔
ورزش وہ جسمانی سرگرمی ہے جو آپ کے دل کی دھڑکن کو بڑھا دیتی ہے (مثلاً دوڑنا، سائیکل چلانا، تیراکی، ٹینس یا رگنگ کرنا)۔
یہ سرگرمیاں مجموعی صحت کو بہتر بناتی ہیں اور موت کے خطرے کو کم کرتی ہیں، جسم کی اضافی چربی کو کنٹرول کرنے میں مدد دیتی ہیں، مدافعتی، نظام ہاضمہ، پٹھوں، سانس اور قلبی نظام کو بہتر بناتی ہیں۔
اگرچہ دوڑنے سے زیادہ کیلوریز جلتی ہیں، تاہم چلنا بھی قلبی صحت کو بہتر بناتا ہے۔
چلنے کے فوائد
یہ دل کو متحرک کرنے تاہم ایک کم اثر رکھنے والا طریقہ ہے اور جوڑوں پر اتنا اثر نہیں ڈالتا جتنا دوڑنے کی صورت میں ہوتا ہے، اس کی وجہ یہ ہے کہ چلنے کے دوران ہر قدم پر وزن کی منتقلی قدرے آہستہ ہوتی ہے۔
چلنے سے پٹھے چربی کو بطورایندھن استعمال کرتے ہیں اس طرح طویل عرصے تک چلنا ایروبک صلاحیت کو بہتر بناتا ہے، ایروبک صلاحیت سے مراد یہ ہے کہ آپ کا جسم ورزش کے دوران آکسیجن کو کتنی اچھی طرح استعمال کرتا ہے۔ زیادہ ایروبک صلاحیت آپ کو زیادہ شدت والی جسمانی سرگرمی کرنے کی اجازت دیتی ہے۔
چلنا پٹھوں کو سکڑنے میں مدد دیتا ہے، جس سے گلوکوز کی صفائی میں اضافہ ہوتا ہے، یعنی آپ کا جسم گلوکوز (چینی) کو کتنی اچھی طرح استعمال کرتا ہے۔ اس سے وقت کے ساتھ ساتھ خون میں گلوکوز کی اوسط سطح بہتر ہوتی ہے، جو ذیابیطس سے تحفظ فراہم کرتی ہے حتیٰ کہ اسے الٹنے میں بھی مدد دیتی ہے۔
چلنا دل کے پٹھے کو متحرک کرتا ہے، خون کی گردش کو بہتر بناتا ہے، اور وقت کے ساتھ ساتھ بلڈ پریشر کو کم کرتا ہے۔
چہل قدمی دوسری کارڈک سرگرمیوں کی نسبت کم شدت رکھتی ہے اس لیے یہ ان لوگوں کے لیے زیادہ مناسب ہے جو زیادہ شدت والی ورزش نہیں کر سکتے۔
دوڑنے کے فوائد
دوڑنے کے بھی چہل قدمی سے ملتے جلتے فوائد ہیں۔ اس کی زیادہ شدت دل کی مزید تحریک فراہم کرتی ہے جو دل کو زیادہ محنت کرنے پر مجبور کرتی ہے، اس طرح جسم میں کئی صحت مند تندیلیاں جنم لیتی ہیں۔
دل کی کارکردگی بہتر ہوتی ہے، دل کے خون پمپ کرنی کی صلاحیت میں اضافہ ہوتا ہے۔ جسم میں خون کی گردش بہتر ہوتی ہے۔ آپ کا جسم گلوکوز کو اچھی طرح استعمال کرتا ہے، کیونکہ دوڑنے کے لیے زیادہ توانائی کی ضرورت ہوتی ہے یہی وجہ ہے کہ آپ کم وقت میں زیادہ کیلوریزاستعمال کرتے ہیں۔
چلنے اور دوڑنے کے فائدے اور نقصانات
دوڑنا کارکردگی کے نقطہ نظر سے بہت زیادہ فوائد رکھتا ہے کیونکہ یہ کم وقت میں زیادہ تبدیلیاں لاتا ہے۔ تاہم، دوڑنا آپ کے جوڑوں پر بہت زیادہ اثر ڈال سکتا ہے، خاص طور پر اگر آپ کو ہڈیوں یا پٹھوں سے متعلق کو ئی مرض ہے۔
چلنا آپ کے جوڑوں پر کم دباؤ ڈالتا ہے لیکن دل کو اتنی تحریک نہیں دیتا کیونکہ یہ کم شدت والی سرگرمی ہے، چلنا اتنی زیادہ ایروبک صلاحیت میں بہتری نہیں لاتا اور گلوکوز اور کیلوریز جلانے میں کم مؤثر ہے۔
آپ کے لیے صحیح انتخاب کیسے کریں
چلنا اور دوڑنا منتخب کرنے کا انحصار آپ کے مخصوص مقاصد، مجموعی طور پر جوڑوں کی صحت، اور ذاتی ترجیحات پر ہے۔
